Rosa Blanca e Óscar Rodríguez, administradores solidarios de Espina & Delfín, recolleron o XIII Premio á Excelencia Empresarial que outorga o Club Financeiro de Santiago, un recoñecemento que chea de orgullo a todo o equipo. O acto reuniu a representantes institucionais de primeiro nivel, entre eles a alcaldesa de Santiago, Goretti Sanmartín, e a conselleira de Economía e Industria, María Jesús Lorenzana, alén do presidente do CFS, Roberto Pereira.
Un premio ao legado e ao futuro
Durante a entrega, Roberto Pereira quixo subliñar a calidade do tecido empresarial galego e puxo a Espina & Delfín como exemplo diso, destacando a Rosa Branca e Óscar como continuadores do proxecto iniciado polo seu pai, capaces de impulsar unha expansión baseada na innovación e o bo goberno corporativo. Tamén lembrou a relevancia que ten hoxe, máis que nunca, o sector da xestión do ciclo integral da auga, describíndoo como unha actividade esencial para o planeta e para as persoas.
As persoas, protagonistas do discurso
Na súa intervención, Rosa Branca puxo o foco no que, ano tras ano, repetimos que é a verdadeira fortaleza desta casa: o equipo. Insistiu en que o éxito da empresa non se explica polas máquinas, os edificios ou a estratexia, senón polas persoas e por como se relacionan entre si, e quixo deixar claro que, aínda que fosen eles dúas quen subise a recoller a distinción, o premio pertence a todo o coro que formamos como organización.
Óscar Rodríguez, pola súa banda, ofreceu un discurso salpicado de anécdotas familiares que puxeron de manifesto ata que punto a súa vida e a da empresa camiñaron sempre da man. Lembrou como mesmo os plans familiares máis sinxelos, como ir comer á praia, estaban marcados por esta forma de entender o traballo: contou que, nos días de praia, a familia elixía primeiro un punto do roteiro onde houbese algo que reparar ou resolver, e só despois, co asunto solucionado, continuaban todos xuntos cara ao piñeiral para comer. Unha imaxe que arrincou sorrisos entre os asistentes e que reflicte moi ben esa cultura de compromiso e dispoñibilidade que acompañou á compañía desde as súas orixes, e que hoxe seguimos levando connosco no día a día.
Casi medio século de traxectoria
Espina & Delfín naceu en Santiago de Compostela nos anos 70 co propósito de desenvolver sistemas de xestión do ciclo integral da auga, desde a captación ata o seu retorno á natureza. Con sede no Polígono do Tambre, hoxe somos referentes do sector hidráulico grazas a un modelo de organización horizontal e integrado que nos permite cubrir todas as fases do negocio, desde o deseño de solucións ata a explotación e o mantemento dos servizos.
Entre os nosos fitos destacan máis de 100 depuradoras executadas, máis de 30 plantas de tratamento de auga potable construídas e servizos prestados a máis de 50 concellos, alén de proxectos internacionais en Portugal, Senegal, Colombia e Haití. Contamos cun persoal medio superior aos 400 empregados e unha permanencia media de máis de 15 anos, un dato que confirma que as persoas seguen sendo o verdadeiro piar deste proxecto.
A esta traxectoria súmase a nosa aposta constante pola innovación: en xuño de 2025 inauguramos o noso novo laboratorio de análise de augas en Santiago, acreditado por ENAC e con capacidade para máis de 200 parámetros, e fomos a única empresa galega que obtivo financiamento en solitario na primeira convocatoria do PERTE de Dixitalización da auga.
Un xurado unánime
O xurado, formado polo Consello de Administración do Club Financeiro de Santiago, elixiu a Espiña & Delfín por unanimidade para este XIII Premio á Excelencia Empresarial, que en edicións anteriores recoñeceu a firmas como Jealsa, Grupo Pérez Rumbao, EGASA, UROVESA, Congalsa, Castrosua, ABANCA, El Correo Gallego, HM Hospitais, Sabadell Gallego, Limpezas Salgado ou Grupo Agrelo.
