Espiña & Delfín, empresa concesionaria do servizo municipal de auga en Sanxenxo, estará presente na II Feira do Medio Ambiente organizada polo Concello de Sanxenxo con motivo do Día Mundial do Medio Ambiente. Unha cita que a empresa aproveita para lanzar a súa campaña de concienciación cidadá “Coidemos a auga: recicla o teu aceite doméstico”, centrada no impacto que os residuos líquidos domésticos, especialmente o aceite usado, teñen sobre a rede de saneamento e os ecosistemas locais.
O aceite usado: un problema maior do que parece
Cada vez que vertemos aceite usado polo vertedoiro ou o inodoro, estamos a xerar un problema ambiental que vai moito máis alá da nosa cociña. As verteduras domésticas inadecuadas, especialmente o aceite usado, afectan directamente á rede de saneamento e ao tratamento das augas residuais. Alén de provocar atascos e encarecer a depuración, poden contaminar ríos e ecosistemas enteiros. A magnitude do problema é maior do que imaxinamos: segundo o Ministerio para a Transición Ecolóxica, un só litro de aceite pode contaminar ata mil litros de auga.
O aceite forma unha película impermeable sobre a auga que impide a osixenación, afecta á fauna e a flora acuática e dificulta enormemente o traballo das estacións depuradoras de augas residuais. En municipios costeiros como Sanxenxo, onde o mar e os ríos son parte esencial da paisaxe e da actividade económica, protexer a auga é unha responsabilidade colectiva.
Que podes facer ti?
A solución é sinxela: nunca vertas o aceite usado polo desaugadoiro. Unha vez frío, gárdao nunha botella pechada e lévao a un punto limpo ou aos contedores habilitados para iso. Este pequeno xesto marca unha gran diferenza para o medio ambiente e para o funcionamento dos servizos de auga do teu municipio.
Para facilitar este hábito, durante a II Feira do Medio Ambiente os veciños e visitantes poderán achegarse á caseta de Espiña & Delfín para recoller gratuitamente un embude especial para a reciclaxe de aceite doméstico usado, así como un díptico informativo con consellos prácticos para evitar que residuos líquidos como aceites, deterxentes ou produtos químicos cheguen á rede de saneamento.